Arddangosfeydd Blaenorol

Graddiodd y dylunydd a'r gwneuthurwr gemwaith o Gymru, Donna Barry, o Goleg Celf Caeredin ble datblygodd ei thechneg doddi bersonol. Mae Donna'n creu dalennau arian gweadog a ysbrydolir gan ailadrodd mewn natur a siapiau a phatrymau pensaernïol. Trwy drefnu'r siapiau hyn a pheri iddynt orgyffwrdd, ac yna eu toddi a'u ffurfio, mae darnau gorffenedig Donna'n edrych yn debyg i elfennau o fflora a ffawna hardd.

Mae Matt ac Amanda Caines wedi canlyn eu hymarfer mewn celfyddyd gain ers blynyddoedd lawer, Matt fel cerfiwr cerrig ac Amanda fel gemydd ac artist cyfryngau cymysg. Yn 2012, symudon nhw i Gymru a chychwyn ar broses o uno cerrig, pren, corn carw, metel a thecstilau. Mae eu gwaith yn clymu cyfryngau annhebyg at ei gilydd mewn gweledigaeth a rennir. Hon fydd yr arddangosfa fawr gyntaf o waith cydweithredol y pâr.

Ac yntau’n rhan o genhedlaeth euraid yn y Coleg Celf Brenhinol oedd yn cynnwys egin-sêr y cyfnod Pop Art, megis Derek Boshier, David Hockney, Alan Jones, R. B. Kitaj a Barry Bates, aeth John Selway ati ar unwaith i ddilyn ei agenda artistig ei hun. Ac yntau wastad yn gweithio o’r cof, mae wedi mentro ymhell ac agos i chwilio am destunau addas. Yn diwtor dylanwadol yng Ngholegau Celf Caerfyrddin a Chasnewydd, boed yn chwarae â chelf haniaethol, yn cymryd ysbrydoliaeth o lenyddiaeth neu’n ymateb i dirwedd, ei destun pennaf, fel erioed, yw cyflwr y bod dynol. Mae John yn aelod o Grŵp 56.

Gemydd cyfryngau cymysg yw Emily, sy'n gweithio ar hyn o bryd gyda phren, laminiad ac arian. Mae'n defnyddio technegau fel tyllu, llyfnu, cwyro, rhybedu a sodro, gyda phob darn yn datblygu oddi wrth yr un blaenorol. Mae'n tynnu lluniau ei syniadau cychwynnol, a ddaw o blanhigion, adeiladau, ail-wneud, patrwm a lliw, yn ei llyfr braslunio, yna maent yn datblygu'n reddfol wrth i Emily weithio gyda'r deunyddiau. Yn wreiddiol o Henffordd, astudiodd Emily ym Mhrifysgol Brighton a nawr mae'n gweithio yn Llundain.