Arddangosfeydd Blaenorol

Mae'r gweadau sy'n ymddangos yn naturiol ar wynebau mewn amrywiol dirweddau trefol a gwledig yn sylfaenol i ymarfer Paul Wearing. Mae'n mynegi ei berthynas â'r rhain drwy'r wyneb gwydrog a'r ffurf llestr cerfluniol ceramig. Mae'r berthynas hon rhwng y cylchredau bywyd datblygol arafach ym myd natur, a'r broses o wneud sy'n arwain at ddatblygiadau alcemegol yn yr odyn, yn greiddiol i'w waith: mae'n ddeialog rhwng pethau o waith llaw ac ymddangosiadau natur.

Mae Gemwaith Susan Kerr yn gasgliad o ddyluniadau arian gwreiddiol, wedi eu saernïo â llaw, sy'n cynnwys clustdlysau, mwclis, tlysau, breichledau a phinnau. Daw ei hysbrydoliaeth o arddulliau eiconig y cyfnodau Art Nouveau ac Art Deco, ac mae'r canlyniad yn gasgliad hardd ac addurnol o emwaith sy'n cynnwys arian, nacr, a gleiniau lled-werthfawr. Mae'r dyluniadau blodeuog arddulliedig yn creu detholiad o emwaith sy'n fenywaidd, ond eto'n fodern.

Ers iddi gael ei sefydlu ym 1966, mae Canolfan Gelfyddydau Llantarnam Grange wedi cynnal dros bum cant o arddangosfeydd ac wedi dangos gwaith miloedd yn llythrennol o artistiaid cain a chymhwysol. Mae'r arddangosfa arbennig hon sy'n dathlu'r 50 mlwyddiant yn cyflwyno detholiad o waith, yn hen a newydd, gan dri deg o'r artistiaid mwyaf dylanwadol y mae eu gwaith wedi ei arddangos yn y ganolfan.

Vicky Lindo Ceramics yw'r bartneriaeth greadigol rhwng Vicky Lindo a William Brookes. Maent yn cynhyrchu crochenwaith sgraffito pridd wedi ei slip castio, gan ddefnyddio slipiau a lliwiau dan wydredd i ddarlunio ac addurno'u llestri bwrdd a'u ffigyrau o anifeiliaid. Aeth y ddau i Goleg Celf a Dylunio Swydd Henffordd ble arbenigodd Bill mewn dylunio offerynnau cerddorol a Vicky mewn Tecstilau Darluniadol. Ysbrydolir eu gwaith gan grochenwaith slip Bideford a gynhyrchwyd yng Ngogledd Dyfnaint yn ystod y 18fed-20fed canrifoedd.

Mae Leoma'n defnyddio rhwyllo, ffurfio siapiau a gosod gemau i greu gemwaith hardd a ysbrydolir gan adenydd. Mae Leoma'n cynnwys motiffau gyda siapiau solet a gosodiad gemau i greu agwedd haniaethol a chyfoes. Gwelir cyferbyniad rhwng yr effaith du a gwyn a'r gemau disglair a dorrwyd yn anarferol sy'n cyd-fynd â’i gilydd yn berffaith.

Mae gemwaith a gwrthrychau gwisgadwy Leoma'n dylanwadu ar ei gilydd ac mae'r darnau hyn yn cynrychioli sentimentaliaeth a gyfoethogir gan yr agosatrwydd a gaiff ei greu rhwng gwrthrych a chorff.